Үржар ауданы әкімінің блогы

Жаңа жыл - әрбір адамның жыл сайын асыға күтетін ең бір тамаша да әсерлі, болашаққа үлкен үміт артып, жақсы тілек ететін мерекелерінің бірі. Бұл күні өткенді саралап, келешекке бағыт-бағдар жасаймыз. Тәуелсіздігіміздің 20 жылдық мерекесін атап өткен ескі жылды жауып, жаңа жылдың табалдырығын аттағалы тұрған бұл мейрамды өз деңгейінде атап өту әрқайсымыз үшін үлкен қуаныш.

«Сен де бір кірпіш дүниеге кетігін тап та, бар, қалан!» деп, ұлы Абай атамыз айтқандай, бүгін ұлтымыздың ертеңі, мемлекетіміздің болашақ тұтқасы болар білімді де, тәрбиелі аудан оқушылары жиналып отырсыңдар. Алдыңғы аға, апаларыңның атқарып келе жатқан игілікті істерін, Тәуелсіз қазақ елінің даму жолын Сендер - жас жеткіншіктер береке-бірлікпен, бір жанұяның баласындай жалғастыру алдарыңдағы киелі парыз, ортақ міндеттерің. Өйткені, Сендер мемлекетіміздің мақтанышы, болашақ абыройы мен тірегісіңдер. Біз ауданымызда осындай терең біліммен сусындаған өнерлі жастардың өсіп келе жатқандығын зор мақтаныш тұтамыз.

Елбасымыз Н.Ә.Назарбаевтың өзі бас болып ұрпағымыздың білімді де, тәрбиелі болып өсуіне мүмкіншілік жасап отыр. Соның бір айғағы Қаратұма, Науалы ауылдарында заман талабына сай үлкен мектептердің жаңадан салынып, таяу арада балаларға сыйға тартылуы болса керек. Сонымен бірге шалғай жатқан шағын ауылдарымызды қоса есептегенде 11 жаңа мектептің құрылысы жүргізілуде. Бұл үлкен қуаныш, үлкен еңбек. Мұндай мектепте оқыған балалар терең білім, үлгілі тәрбие алуы тиіс. «Білекті бірді, білімді мыңды жеңеді» дегендей бүгінгі заманда білімді адам ең рухани бай, ең мықты адам. Сондықтан да білімді игеріңдер, спортпен шұғылданыңдар, шымыр да жігерлі азамат болып өсіңдер.

Елге, туған жерге, Отанға деген сүйіспеншілік, мемлекеттік рәміздеріміз Ту, Елтаңба, Әнұранымызды өз деңгейінде құрметтеп, оларды дәріптеп, асқақтата көтеру кез-келген қазақстандық жастың киелі міндеті. Мен сендердің өнегелі, білімді балалар болатындықтарыңа кәміл сенемін. Өз атымнан, аудандық мәслихат депутаттары атынан сендерге зор денсаулық, терең білім, жарқын да кемел болашақ тілеймін.

Жаңалық пен жақсылықты үміт ететін Жаңа жыл барлықтарыңызға шаттық, мол табыс, құт-береке әкелсін. Әр жанұяға бақыт құсы ұялап, қуаныш сыйласын.

Келе жатқан 2012 жыл құтты болсын!

Елбасы Н.Ә.Назарбаев халқымыздың болашағы туралы тереңінен толғана отырып,  «Мемлекетіміздің  ең басты дүниесі тек қана табиғи байлық емес, сонымен қатар  жасөспірім  ұрпағы, өйткені олар біздің ұлтымыздың болашақ айнасы» деген болатын. Олай болса, осы жас ұрпаққа білім мен тәрбие беретін ұстаз міндеті баға жетпес биік. Сол себепті  қазіргі таңда білім саласында жүргізіліп  жатқан  реформалардың басты  мақсаты - ой-өрісі жаңашыл, шығармашылық деңгейде қызмет  атқара алатын, дүниетанымы жоғары, жан-жақты қамтылған жеке тұлға даярлау болып отыр.

Қазіргі уақыт талабы - шәкірт білімін игерту. Бұл талап  күн өткен сайын мұғалімге міндет үстіне міндет жүктеуде. Мектептердің материалдық базасын нығайтуға басты назар аударылуда. 2011 жылы Науалы және Қаратұма ауылдарында 320 балаға арналған  2 мектеп іске қосылмақ, сонымен қатар 6 мектептің құрылысы басталады. Жаңа оқу жылында 75 балаға  арналған балабақша Үржар ауылында іске қосылмақ. Аудан бойынша ауыз толтырып айтарлықтай жұмыстар жүргізіліп, жаңа мектептер салу ісі мен күрделі жөндеу жұмыстары үлкен қарқынмен жүргізілуде. Мектептердің өзін-өзі қаржыландыру, оқушыларды ыстық тамақпен қамтамасыз ету мақсатында аудандағы мектептерге жер телімдері бөлініп, тиісті жұмыстар атқарылуда. Ең бастысы ҰБТ нәтижесі жылдан жылға жақсаруда 2011 жылы облыс көлемінде Үржар ауданы 4 орынға ие болды. Биылғы жылы аудан бойынша мектеп оқушыларының жазғы демалысы өз деңгейінде ұйымдастырылды, оқушылар уақытын тиімді пайдалану мақсатында Алакөл жағалауында «Үржарайым» атты аудандық лагерьде демалды, 54 мектеп жанындағы лагерлер түгелдей жұмыс істеді.

Мектеп - білім берудегі басты құрал, халық келешегі тек осы мектепте. Мектеп - ұлттың болашағы. Тіл білімінің рухани көсемі Ахмет Байтұрсыновша  айтсақ «Мұғалім қандай болса, мектепте сондай болмақшы» дегендей қазіргі уақытта мектептеріміздің барлығы білімді мамандармен толықтырылуда. Сондықтан білім беру қызметкерлерінің алдында үлкен міндет, ауыр жүк тұр. Өйткені бүгінгі оқушы, еліміздің ертеңгі болашағы. Оларға мазмұны терең білім, сапалы берер басты тұлға- ұстаз.

Осыған орай, ұстаздар қауымын, ата-аналар мен оқушыларды Қазақстан Республикасы Конституциясының 16 жылдығымен және жаңа оқу жылының басталуымен, өз атымнан шын жүректен құттықтаймын. Оқу жылында еңбектеріңізге жеміс, шығармашылық, табыс тілеймін.

Қасиетті де ұлы мереке қарсаңында Сіздерді Жеңіс күнімен шын жүректен құттықтаймын!

Осыдан 66 жыл бұрын адамзат тарихында ең ауыр және қанды соғыстың соңғы оқтары атылды. Содан бері 1945 жылдың 9 мамыры жұртшылық жадында біздің халқымыздың ерлік үлгісі, мұқалмас қажырлығы мен мызғымастығының символы болып келеді.

Екінші дүниежүзілік соғыс туралы сөз қозғағанда орасан зор құрбандықтармен келген жеңіс мерекесіне ерекше толғаныспен тоқталмау мүмкін емес. Жыл сайынғы көктемнің ерекшелігі, ол өзімен бірге барлығымыз сағына күтетін үлкен мереке – Ұлы Жеңіс күнін ала келеді. Бұл мереке әрбір отандастарымыз үшін, ардагерлер үшін аса қымбат, аса ыстық. Өйткені, Сіздер кешегі қан майданда Отан үшін, бейбіт өмір үшін, ұрпақ келешегі үшін қан төктіңіздер, өмірлеріңіздің ең тамаша кезеңі – жастық шақтарыңызды соғысқа арнадыңыздар.

Ерлік қашан да мәңгі жасайды. Өйткені, ерлікке тағзым ету – тарихқа тағзым ету, ата-бабамызға тағзым ету. Соғыс жылдарында қан майдандағы сарбаздармен қатар батырлықтың үлгісін көрсеткен тыл еңбеккерлерінің де еңбек майданындағы өрелі істерін үлкен ерлікке бағалауға болады. Осындай өнегелі үрдісті жалғастыру ұрпақ үшін үлкен парыз.

     Аға ұрпақ алып берген Жеңіс бүгінгі күні де бізді жетістіктерге жігерлендіреді, жанымызға қуат береді, қиындықтарды жеңіп, алға ұмтылуымызға көмектеседі.

Құрметті ардагерлер!

Сіздер елімізді жаудан ерлікпен қорғай білдіңіздер. Ал бейбіт күндерде еліміз бен туған өлкеміздің игілігіне адал еңбек еттіңіздер. Қандай шаруаға да белсене қатыстыңыздар.   Сіздерге шын көңілден денсаулық, тіршіліктің ұзақ та жарқын, алаңсыз күндерін, жан шуағын, жақын адамдарыңыздың қамқорлығы мен ықыласын тілеймін. Өздеріңіз куә болып жүргендей ұлтарақтай жерін жауға таптатпау үшін қан төккен, өмірін қиған батыр бабалар еңбегі, Сіздердің еңбектеріңіз зая кеткен жоқ. Сіздер жаудан қорғаған туған елімізді көркейту үшін, оның болашағы үшін бүгінгі ұрпақтарыңыз аянбай еңбек етуде.

Ардагерлерге қошемет ешқашан ортаймақ емес. Сіздердің майдандағы ерліктеріңіз, бейбіт замандағы өскелең ұрпаққа беріп келе жатқан тәрбиелеріңіз өлшеусіз.

Ұлы Жеңістің 66 жылдық мерекесі құтты болсын, құрметті ардагерлер! Әр отбасына бейбітшілік, бақыт тілеймін! Туған еліміз, ортақ Отанымыз – Қазақстан Республикасы өсіп, өркендей берсін.

    Қымбатты үржарлықтар! Сіздерге және отбасыларыңызға ізгіліктер мен игіліктер тілеймін! Табыстар мен сәттіліктер мол болсын!
Елімізде ынтымақ, береке болсын!